नेपाली कांग्रेसका महामन्त्री गगन थापाले पूर्वप्रधानमन्त्री माधवकुमार नेपालमाथि अख्तियार दुरुपयोग अनुसन्धान आयोगले दायर गरेको मुद्दालाई अदालतको विषय भएकाले त्यसमा विश्वास गर्नुपर्ने बताएका छन्। “अब अदालतले न्याय दिन्छ भन्नेमा हामी ढुक्क हुनु पर्छ,” थापाले भने, “कसैलाई अन्याय नहोस्, दोषी उन्मुक्त नपाओस् भन्ने अपेक्षा अदालतबाट हुन्छ।”
शुक्रबार विराटनगर विमानस्थलमा सञ्चारकर्मीहरूसँग कुरा गर्दै थापाले अख्तियार दुरुपयोग अनुसन्धान आयोगले अनुसन्धानपछि अदालतमा मुद्दा दायर गरेको भन्दै अब फैसला गर्ने जिम्मा अदालतको भएको स्पष्ट गरे।
नेपालविरुद्ध लामो समयदेखि चर्चामा रहेको ललिता निवास जग्गा प्रकरणमा अख्तियारले हालै प्रतिवादी बनाउँदै भ्रष्टाचार मुद्दा दर्ता गरेको हो। यस विषयलाई लिएर विभिन्न तहबाट आलोचना र समर्थन दुवै भइरहेका छन्।
थापाले अदालतमा पुगेको विषयमा सार्वजनिक टिप्पणी नगर्नु उपयुक्त हुने भन्दै यसमा निष्पक्ष निर्णय हुने विश्वास व्यक्त गरे।
त्यस्तै, गृह मन्त्रालयअन्तर्गतको भिजिट भिसा अनियमिततामा गृहमन्त्री रमेश लेखकको राजीनामा माग गर्ने विषयमा उनले तत्काल आवश्यक नरहेको बताए। अनुसन्धान प्रक्रियालाई निष्पक्ष रुपमा अघि बढ्न दिनुपर्ने भन्दै उनले अख्तियारको काममा हस्तक्षेप गर्न नहुने धारणा राखे।
सरकारको कार्यक्षमताबारे पनि थापाले आत्मालोचना गर्दै वर्तमान सरकार अपेक्षित रूपमा नचलेको स्वीकार गरे। “सरकारले जनताले चाहेको गति दिन सकेको छैन,” उनले भने, “तर हामी त्यसमा सुधार ल्याउनेतर्फ लागिरहेका छौं।”
उनले सरकार सञ्चालनलाई प्रभावकारी बनाउन कांग्रेसभित्र गम्भीर समीक्षा र छलफल भइरहेको पनि उल्लेख गरे।
