काठमाडौं, ३० असार — नेकपा (माओवादी केन्द्र) अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले वर्तमान सरकारले भ्रष्टाचार नियन्त्रणमा गम्भीरता नदेखाएको आरोप लगाएका छन्। सोमबार प्रतिनिधिसभामा सम्बोधन गर्दै उनले सरकार गठनपछिको काम कारबाहीले भ्रष्टाचारीलाई जोगाउने प्रयास भइरहेको स्पष्ट भएको दाबी गरे।
दाहालका अनुसार अघिल्लो सरकारले अगाडि बढाएका जनमुखी कार्यक्रमहरूलाई कमजोर पारिएको छ र भ्रष्टाचारसम्बन्धी अनुसन्धानका फाइलहरू क्रमशः बन्द गरिँदैछन्। उनले सरकार गठनकै उद्देश्य सुशासनप्रति डरका कारण भएको भन्दै अहिले पनि त्यही डरकै कारण भ्रष्टाचार बढिरहेको टिप्पणी गरे।
उनले विशेषगरी सम्पत्ति शुद्धिकरणको कार्यप्रति संकेत गर्दै त्यसको गतिविधि बढ्दै गएको र देश ग्रे लिस्ट बाट नबच्ने जोखिम रहेको उल्लेख गरे। उनका अनुसार सरकारले ठूला दलहरूको मिलोमतोमा खुला रूपमा भ्रष्टाचारमा लिप्त व्यक्तिहरूलाई जोगाउने काम गरिरहेको छ।
