काठमाडौँ, साउन ३० — राष्ट्रिय युवा सङ्घ नेपालले आगामी भदौ १ गते (१७ अगस्ट, २०२५) ‘अन्तर्राष्ट्रिय आइटी युवा सम्मेलन २०२५’ आयोजना गर्ने भएको छ। यो सम्मेलन भर्चुअल माध्यमबाट सञ्चालन हुनेछ र विश्वभरका नेपाली युवालाई डिजिटल प्लेटफर्ममार्फत एकीकृत गर्ने उद्देश्य राखिएको छ। आयोजकका अनुसार सम्मेलनमा १ करोडभन्दा बढी नेपाली युवाको सहभागिता रहने अपेक्षा गरिएको छ।
सम्मेलनको मुख्य नारा “कनेक्टिङ नेपाली युथ ग्लोबल्ली” रहेको छ। कार्यक्रममा प्रधानमन्त्री केपी शर्मा ओलीले सम्बोधन गर्ने छन्। साथै सञ्चार तथा सूचना प्रविधि मन्त्री पृथ्वीसुब्बा गुरुङ, डिजिटल पूर्वाधार विज्ञ डा. सुदन झा र साइबर सुरक्षाविद् प्रो. मोशे वाय. वार्डी लगायतका प्रतिष्ठित व्यक्तिहरूले विचार व्यक्त गर्ने कार्यक्रम रहेको छ।
कार्यक्रममा नेपालको डिजिटल नीति, सूचना प्रविधि क्षेत्रमा सम्भावना र चुनौती, अन्तर्राष्ट्रिय अनुभव, रोजगारी र उद्यमशीलताको अवसरबारे छलफल हुने छ। सम्मेलनमा विश्वभर रहेका नेपाली युवाले नवप्रवर्तन, प्रविधि र सफलताका कथाहरू प्रस्तुत गर्ने अवसर पाउने आयोजकहरूले बताएका छन्।
भर्चुअल सम्मेलनमा अनलाइन दर्ता निःशुल्क हुनेछ र नेपाली तथा अङ्ग्रेजीमा प्रत्यक्ष अनुवाद सुविधा पनि उपलब्ध गराइनेछ। राष्ट्रिय युवा सङ्घ नेपालका अध्यक्ष क्षितिज थेबेले सम्मेलनलाई डिजिटल नेपालको भविष्य निर्माणतर्फ एक महत्त्वपूर्ण कदमको रूपमा वर्णन गर्दै भने, “यो केवल भर्चुअल कार्यक्रम मात्र होइन, विश्वव्यापी युवाको साझा आन्दोलन हो, जसले नेपालमा युवा नेतृत्व र सहकार्यमार्फत डिजिटल भविष्यलाई अगाडि बढाउनेछ।”
आयोजकहरू विश्वास राख्छन् कि यस सम्मेलनले विश्वभरका नेपाली युवालाई जोड्ने मात्र नभई उनीहरूको सृजनशीलता, नवप्रवर्तन र उद्यमशीलतालाई प्रोत्साहित गर्ने अवसर पनि प्रदान गर्नेछ।
