काठमाडौं, असार ३१ – साउन १ गतेबाट काठमाडौँको धरहरा बिहान ८ बजेदेखि बेलुकी ८ बजेसम्म खुला हुने भएको छ। यससँगै अब सार्वजनिक बिदामा पनि धरहरा अवलोकन गर्न पाइनेछ।
अहिलेसम्म धरहरा बिहान १० देखि बेलुकी ४ बजेसम्म मात्र खुला हुँदै आएको थियो र सार्वजनिक बिदामा बन्द गरिन्थ्यो। अबदेखि साप्ताहिक बिदा बुधबार हुनेछ भने अन्य दिन धरहरा खुला रहनेछ।
२०७२ सालको भूकम्पले ढलेको धरहरा पुनर्निर्माणपछि २०७९ असोज ३ गते परीक्षणका रूपमा खुला गरिएको थियो। पछिल्ला सात महिनामा धरहराबाट ४ करोड ३३ लाख रुपैयाँभन्दा बढी राजस्व संकलन भइसकेको छ। हालसम्म २ लाख ३७ हजारभन्दा बढीले धरहरा चढिसकेका छन्।
त्यस्तै, झापाको दमकमा रहेको १८ तल्ले व्यापारिक कम्प्लेक्स पनि साउन १ बाट सर्वसाधारणका लागि खुला हुने भएको छ। यो कम्प्लेक्स धरहराभन्दा अग्लो छ र १०० मिटर उचाइको छ।
शहरी विकास मन्त्रालयले साउन १ देखि सम्पूर्ण सरकारी प्रक्रिया डिजिटल बनाउने तयारी पनि गरिरहेको छ। मन्त्रालयका कामकाज अब कागजविहीन प्रणाली मार्फत हुनेछ। साथै, अनधिकृत रुपमा प्रयोग भइरहेका सरकारी गाडी फिर्ता ल्याइएको छ र अब सवारी सुविधा सरकारले तोकेको मापदण्ड अनुसार मात्र प्रदान गरिने छ। मन्त्रालयले हाजिरी प्रणालीमा पनि कडाइ गर्ने घोषणा गरेको छ।
