२५ भदौ, काठमाडौं । राजधानीमा भड्किएको आन्दोलनका क्रममा सुरक्षाकर्मीबाट लुटिएका हतियार फिर्ता दिन सुरु गरिएको छ । मंगलबारको झडपमा प्रहरीले गुमाएका झण्डै दुई दर्जन बन्दुक र अन्य सामग्री नेपाली सेनाले संकलन गरेको छ ।
सैनिक जनसम्पर्क निर्देशनालयका अनुसार हालसम्म २३ वटा हतियारसहित करिब ३३ लाख ७० हजार रुपैयाँ नगद र सञ्चार उपकरण सेनाको जिम्मामा आइसकेका छन् । भक्तपुरको लोकन्थलीमा गस्तीमा रहेका सैनिक टोलीलाई पनि युवाहरूले आफूसँग रहेका हतियार बुझाएको पुष्टि गरिएको छ ।
जेनजी आन्दोलन उग्रिँदै गएपछि मंगलबार प्रदर्शनकारीले प्रहरीमाथि आक्रमण गर्दै हतियार खोसेका थिए । त्यतिबेला सरकारी कार्यालयहरूमा तोडफोड र आगजनी पनि गरिएको थियो ।
स्थिति नियन्त्रणमा लिन राति १० बजेदेखि नेपाली सेनाले राजधानीसहित संवेदनशील क्षेत्रमा सुरक्षा कमाण्ड सम्हालेको छ । सेनाले निरन्तर गस्ती गर्दै लुटपाट र हिंसात्मक गतिविधिमा संलग्न व्यक्तिहरूलाई नियन्त्रणमा लिइरहेको जनाएको छ ।
