१३ भदौ, काठमाडौं । भारतको गुवाहाटीमा जारी टी–२० सिरिजको दोस्रो खेलमा नेपाल ‘ए’ ले आसामलाई ९६ रनले पराजित गर्दै प्रभावशाली प्रदर्शन गरेको छ ।
पहिले ब्याटिङको मौका पाएको नेपाल ‘ए’ ले २० ओभरमा ७ विकेटको क्षतिमा १७३ रन बनाएको थियो। सन्दीप जोराले सर्वाधिक ३५ रनको योगदान दिए भने देव खनाल र पवन सर्राफले समान ३१–३१ रन जोडे। त्यसैगरी बसिर अहमदले २७ रन र विवेक यादवले अविजित २६ रन बनाए।
लक्ष्य पछ्याएको आसामको ब्याटिङ भने नेपाल ‘ए’ का स्पिनरहरूले धराशायी बनाए । युवराज खत्रीले ३.२ ओभरमा मात्र १५ रन खर्चिँदै ४ विकेट झारे भने बसिर अहमदले पनि ३ विकेट लिँदै विपक्षीलाई दबाबमा राखे । कमलसिंह ऐरी, आकाश चन्द र विवेक यादवले १–१ विकेट हात पारे ।
आसामका लागि रुहिनन्दन पेगुले १७ रन बनाएर टोलीको सर्वोच्च स्कोरर भए तर सम्पूर्ण टिम १५.२ ओभरमै ७७ रनमा समेटियो ।
यसअघि सिरिजको पहिलो खेलमा नेपाल ‘ए’ डीएल पद्धतिअनुसार १५ रनले पराजित भएको थियो । पाँच खेलको यो श्रृंखलामा अब बाँकी तीन खेल एसीए रंगशालामा फ्लडलाइटमुनि खेलाइनेछन् ।
