असार २३, वासिङ्टन — इजरायली प्रधानमन्त्री बेन्जामिन नेतान्याहू र अमेरिकाका पूर्वराष्ट्रपति डोनाल्ड ट्रम्पबीचको भेटवार्ता आज हुँदैछ। पछिल्लो समय गाजामा जारी युद्ध र मानवीय संकटबीच भएको यो भेटवार्ताले इजरायल–हमासबीचको सम्भावित युद्धविराम सम्झौतामा सकारात्मक प्रभाव पार्ने विश्वास गरिएको छ।
ट्रम्पले यसै हप्ता युद्धविराम सम्झौता हुनसक्ने आशा व्यक्त गरेका छन्। उनका अनुसार केही बन्धकहरू पहिले नै रिहा भइसकेका छन् र बाँकीलाई पनि चाँडै घर फर्काउन सकिने सम्भावना बलियो छ। नेतान्याहूले पनि वासिङ्टन प्रस्थान गर्नु अघि पत्रकारहरूसँग बोल्दै ट्रम्पसँगको छलफलले वार्ता प्रक्रियालाई गति दिने विश्वास व्यक्त गरेका थिए।
यही सन्दर्भमा कतारको राजधानी दोहामा इजरायल र हमासबीच अप्रत्यक्ष वार्ता सुरु भएको छ। प्रस्तावित सम्झौतामा ६० दिनको युद्धविराम, इजरायली जेलमा रहेका केही प्यालेस्टिनी कैदीहरूको सट्टामा बन्धकहरूको रिहाइ, र गाजाबाट इजरायली सेना फिर्ता जस्ता मुद्दाहरू समावेश छन्।
हमासले युद्ध पुनः नहोस भनेर अन्तर्राष्ट्रिय ग्यारेन्टी र मानवीय सहायता वितरणलाई सुनिश्चित गर्न संयुक्त राष्ट्रसंघको भूमिकाको माग समेत अघि सारेको छ।
इजरायली राष्ट्रपति आइज्याक हर्जोगले पनि नेतान्याहूको भ्रमणलाई “महत्वपूर्ण कूटनीतिक अभियान” भन्दै समर्थन जनाएका छन्, जसले अझै गाजामा रहेका बन्धकहरूलाई उद्धार गर्न मद्दत पुर्याउने अपेक्षा गरिएको छ।
यो वार्ता सफल भएमा गाजामा झण्डै दुई वर्षदेखि जारी हिंसाको चक्र अन्त्य गर्दै त्यहाँको गहिरिँदो मानवीय संकटलाई केही सहज बनाउनेतर्फ ठूलो उपलब्धि मानिनेछ।
