काठमाडौं, १५ भदौ । राष्ट्रिय प्रजातन्त्र पार्टी (राप्रपा) ललितपुर क्षेत्र नम्बर–३ ले सरकारले लागू गरेको इम्बोस्ड नम्बर प्लेट प्रणालीको विरोध जनाएको छ। आइतबार यातायात व्यवस्था कार्यालय पुगेर पार्टीले ज्ञापनपत्र बुझाउँदै सो व्यवस्था तत्काल खारेज गर्न माग गरेको हो।
राप्रपाका केन्द्रीय सदस्य निरञ्जन थापाका अनुसार नयाँ प्रणालीले जनसाधारणलाई सहज बनाउनुभन्दा बढी झन्झट र खर्च थपिदिएको छ। ज्ञापनपत्रमा यसले सर्वसाधारणमध्ये असन्तुष्टि र अन्योलता बढाएको, पारदर्शिता कमजोर पारेको र दुरुपयोग तथा भ्रष्टाचारको सम्भावना बढाएको आरोप लगाइएको छ।
ज्ञापनपत्रमार्फत राप्रपाले इम्बोस्ड नम्बर प्रणाली नागरिकमैत्री नभएको स्पष्ट दाबी गर्दै, यसले संविधानले सुनिश्चित गरेको समान अवसर र न्यायपूर्ण पहुँचमा समेत बाधा पुर्याएको बताएको छ। साथै, सरकारले भविष्यमा यस्ता निर्णय लिँदा सरोकारवालासँग पर्याप्त छलफल गर्नुपर्ने र नागरिकलाई सजिलो हुने प्रक्रिया अपनाउनुपर्ने माग राखिएको छ।
