काठमाडौं, साउन १८ — नेपाली मिश्रित मार्सल आर्ट्स (एमएमए) खेलाडी रवीन्द्र ढाटले म्याट्रिक्स फाइट नाइट १७ (MFN 17) मा ऐतिहासिक सफलता हात पार्दै बान्टमवेट च्याम्पियनसिपको उपाधि जितेका छन्। भारतीय फाइटर चुनरेङ कोरेनलाई पराजित गर्दै उनी एमएफएनको च्याम्पियन बन्ने पहिलो नेपाली खेलाडी बनेका हुन्।
‘दि इन्डियन राइनो’ उपनामले परिचित कोरेनले खेलको शुरुवातमै आक्रामक रणनीति अपनाउँदै दबाब सिर्जना गर्ने प्रयास गरेका थिए। तर रवीन्द्र ढाटले संयमता, चतुराई र रणनीतिक बचाउका साथ प्रतिस्पर्धा गर्दै खेलको लय आफ्नो पक्षमा ल्याउन सफल भए।
तेस्रो राउन्डमा रवीन्द्रको तीव्र र सटीक प्रहारले कोरेनलाई गम्भीर संकटमा पार्यो। एकपछि अर्को कडा प्रहारले कोरेन असहज बन्दै जाँदा अन्ततः रेफ्रीले खेल रोक्दै रवीन्द्रलाई टीकेओ (टेक्निकल नॉकआउट) मार्फत विजेता घोषणा गरे।
यो जितसँगै ढाटको प्रोफेशनल एमएमए रेकर्ड ८ जित र १ हारमा पुग्न सफल भएको छ। साथै, उनले कोरेनको पाँच खेल लामो जित यात्रा पनि तोडेका छन्।
विजयी क्षणमा रंगशालाभरि उत्साह छाएको थियो। पिजरमाथि नेपाली झन्डा गर्वका साथ फहराउँदै रवीन्द्रले देशको नाम उच्च बनाएका थिए।
यो उपाधिसँगै रवीन्द्र ढाट अब दक्षिण एसियाली एमएमए क्षेत्रमा एक प्रभावशाली नामका रूपमा स्थापित भएका छन्।
