काठमाडौं, साउन १० — नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेपाली कांग्रेस र नेकपा एमालेजस्ता प्रमुख दलहरू गम्भीर वैचारिक, राजनीतिक र सांगठनिक संकटमा रहेको दाबी गरेका छन्।
काठमाडौंमा आयोजित एक कार्यक्रममा बोल्दै उनले अहिले देशका ठूला भनिने दलहरू नेतृत्वविहीन दिशामा गइरहेका छन् भने मौलिक विचार र स्पष्ट रणनीतिको अभावले संकट गहिरिँदै गएको बताए।
उनले नेपाली कांग्रेसभित्र विश्वेश्वरप्रसाद कोइराला र गिरिजाप्रसाद कोइरालाजस्तो प्रभावशाली र दूरदर्शी नेतृत्वको अभाव देखिएको उल्लेख गरे। एमालेको सन्दर्भमा भने उनले पार्टीको मूल विचार जनताको बहुदलीय जनवादको साँचो उत्तराधिकारी को हो भन्ने विषयमै विवाद सुरु भएको बताए।
पूर्वराष्ट्रपति विद्यादेवी भण्डारी र प्रधानमन्त्री दुवैबीचको भनाभनले पार्टीभित्रको भ्रम र संघर्ष झन् स्पष्ट भएको उनको टिप्पणी थियो।
अध्यक्ष दाहालले आफू नेतृत्व गरेको माओवादी केन्द्रलाई मात्र यस्तो पार्टीको रूपमा चित्रण गरे जसले हालको परिप्रेक्ष्यमा स्पष्ट विचार, नीति र सांगठनिक एकता कायम राखेको छ। उनका अनुसार, अन्य दलहरू दिशाहीन बन्दै जाँदा माओवादी केन्द्रले मुलुकका समस्या र समाधान दुवैमा अग्रसरता देखाएको छ।
