काठमाडौं, २७ असार — क्यानडाको ब्रिटिश कोलम्बिया प्रान्तको सरे शहरमा भारतीय चर्चित हास्य कलाकार कपिल शर्माको क्याफे ‘क्याप्स क्याफे’मा गोली प्रहार भएको घटना सार्वजनिक भएको छ। स्थानीय समय अनुसार बिहीबार बिहान न्यूटन क्षेत्रस्थित क्याफेमा गोली चलेको पुष्टि प्रहरीद्वारा गरिएको हो।
घटनाको समयमा क्याफेभित्र कर्मचारीहरू उपस्थित भए पनि कुनैपनि व्यक्ति घाइते नभएको प्रहरीले जनाएको छ। यद्यपि, गोलीका कारण क्याफेको झ्यालमा क्षति पुगेको छ र भौतिक क्षतिको विवरण समेत सार्वजनिक गरिएको छ।
प्रहरीका अनुसार यो आक्रमणको उद्देश्य के थियो भन्ने विषयमा अनुसन्धान जारी छ। साथसाथै अन्य सम्भावित आपराधिक घटनासँग यसको सम्बन्ध छ कि छैन भन्ने विषयमा समेत खोजी भइरहेको बताइएको छ।
केही दिनअघि मात्र सञ्चालनमा आएको यो क्याफे कपिल शर्मा र उनकी पत्नी गिन्नी चतरथले सुरु गरेका थिए। आक्रमणपछि क्याफे टिमले सामाजिक सञ्जालमार्फत भावनात्मक सन्देश सार्वजनिक गर्दै हिंसाको विरोधमा दृढतापूर्वक उभिन आग्रह गरेको छ।
वक्तव्यमा क्याफेको उद्देश्य समुदायमा आत्मीयता र सकारात्मकता फैलाउने रहेको उल्लेख गर्दै हिंसाको घटना निकै दुःखद भएको बताइएको छ। साथै, यस्तो कठिन परिस्थितिमा साथ र समर्थन जनाउने सबैलाई धन्यवाद दिँदै क्याफेलाई प्रेम र एकताको प्रतीक बनाउन आग्रह गरिएको छ।
