नेपाली कांग्रेस, नेकपा एमाले र नेकपा माओवादी केन्द्रले संसद्को अवरोध हटाउने विषयमा अनौपचारिक छलफल गरिरहेका छन्। यी तीन पार्टीबीच दिउँसो २ बजे औपचारिक बैठक बस्ने तय भएको छ। विपक्षी दलहरूको बैठकपछि कांग्रेस, एमाले र माओवादी केन्द्रबीच छुट्टै छलफल हुने कार्यक्रम छ।
भिजिट भिसा प्रकरणमा उठेका विवादका कारण जेठ १३ यता संसद् कार्यसूचीमा प्रवेश गर्न सकेको छैन। विपक्षी दलहरूको निरन्तर अवरोधका बीच संसद् पुनः सञ्चालन गर्न कांग्रेस, एमाले र माओवादी नेतृत्वबीच अनौपचारिक र औपचारिक तहमा संवाद भइरहेका छन्। आज दिउँसो २ बजे तीन दलबीच औपचारिक बैठक तय भएको छ।
तीन दलबीचको सहकार्यले संसद् खुलाउने सम्भावना बलियो देखिएको भए पनि राष्ट्रिय स्वतन्त्र पार्टी (रास्वपा) संसदीय छानबिन समिति गठनको मागमा अडिग रहेको छ। रास्वपाले आम सहमतिबाट होइन, छानबिन समितिको औपचारिक गठनबाट मात्रै सत्य उजागर गर्न सकिने अडान लिएको छ।
सरकारले भने अख्तियार दुरुपयोग अनुसन्धान आयोगमार्फत प्रारम्भिक अनुसन्धान अगाडि बढाइसकेको छ। अनुसन्धानपछि आवश्यकता अनुसार छुट्टै संयन्त्र बनाउने प्रस्ताव रहेको सत्तारूढ दलहरूको भनाइ छ।
