काठमाडौं, असार १६ — नेपाली कांग्रेसले आज दिउँसो १ बजे सानेपास्थित पार्टी केन्द्रीय कार्यालयमा केन्द्रीय कार्यसमितिको बैठक बोलाएको छ। बैठकमा पार्टी संगठन सुदृढीकरण, आगामी रणनीति, र सरकारको कामकाजको मूल्याङ्कनलगायत विषयहरूमा विस्तृत छलफल हुने तय भएको छ।
यसअघि शनिबार कांग्रेस सभापति शेरबहादुर देउवाको बूढानीलकण्ठ निवासमा बसेको पदाधिकारी र पूर्वपदाधिकारीहरूको बैठकले आजको बैठकका एजेन्डाहरू तय गरिसकेको थियो।
पार्टी प्रवक्ता डा. प्रकाशशरण महतका अनुसार बैठकमा गठबन्धन सरकारको प्रदर्शन, भ्रातृ संगठनहरूको अवस्था, र सक्रिय सदस्यता वितरण तथा नवीकरणको प्रगतिबारे गम्भीर छलफल हुनेछ। साथै, संघीय र प्रदेश सरकारमा रहेका कांग्रेसका मन्त्रीहरूले आफ्नो कार्यक्षेत्रको प्रगति विवरण प्रस्तुत गर्ने कार्यक्रमसमेत तय भएको छ।
महासमिति बैठक र महाधिवेशनको तयारीसँगै पार्टीभित्रको सांगठनिक अनुशासन र सदस्यता अद्यावधिक प्रक्रिया प्राथमिकतामा राखिएको छ। यसै सन्दर्भमा महामन्त्री गगन थापाले सक्रिय सदस्यताको वितरण प्रगतिबारे बैठकमा प्रतिवेदन प्रस्तुत गर्ने कार्यक्रम रहेको छ।
बैठकले महाधिवेशन तोकिएको समयमा नगर्न सकेका भ्रातृ संस्थाहरूको तदर्थ समितिको अवधि थप गर्ने वा नयाँ समिति गठन गर्नेबारे पनि निर्णय लिने अपेक्षा गरिएको छ। साथै, गठबन्धनको भविष्य र कांग्रेसको भूमिकालाई अझ प्रभावकारी बनाउन रणनीति तय गर्ने उद्देश्यसहित बैठक बस्न लागेको हो।
