काठमाडौं, भदौ २१ — काठमाडौँ उपत्यकामा पछिल्ला दिनमा डेङ्गी सङ्क्रमण तीव्र रूपमा बढ्दै गएको छ। काठमाडौँ महानगरपालिकाले भदौदेखि कात्तिकसम्म रोगको जोखिम उच्च रहने भन्दै सबैलाई सचेत रहन आग्रह गरेको छ।
कामपा स्वास्थ्य विभागका अनुसार अहिले ३२ वटै वडामा डेङ्गीका बिरामी भेटिन थालेका छन्। विभागका फोकलपर्सन ऋषिप्रसाद भुसालले डेङ्गी नियन्त्रणका लागि नागरिक आफैं सक्रिय बन्नुपर्नेमा जोड दिएका छन्। उनका अनुसार केवल सरकारले मात्र काम गरेर रोग नियन्त्रण सम्भव हुँदैन, घरघरमै सचेतना र सरसफाइमा जोड दिनु आवश्यक छ।
महानगरले लामखुट्टे नष्ट गर्ने विशेष अभियान सञ्चालन गरिरहेको छ। पानी जम्ने स्थानहरू—जस्तै गमला, टायर, ड्रम, बोतल आदिमा लार्भा फस्टाउने भएकाले ती ठाउँ सफा राख्न आग्रह गरिएको छ। यसका साथै, माइकिङ, विद्यालयस्तरीय सचेतना कार्यक्रम र समुदायस्तरमै जनजागरण चलाइएको छ।
डेङ्गी फैलाउने एडिस एजिप्टाई नामक पोथी लामखुट्टे विशेषगरी सहरी क्षेत्रमा बढी पाइन्छ। यो लामखुट्टे सफा पानी जमेको ठाउँमा प्रजनन गर्ने भएकाले वर्षायाममा जोखिम झन् बढ्ने स्वास्थ्य विभागले जनाएको छ।
कामपाले हालै स्कुल–स्कुलमा पुगेर विद्यार्थीमार्फत परिवारमा जानकारी पुर्याउने प्रयास गरेको छ। “डेङ्गी नियन्त्रणका लागि ‘खोज र नष्ट गर’ अभियान नै सबैभन्दा प्रभावकारी उपाय हो,” भुसालले बताएका छन्।
