असार १७, काठमाडौं — नेकपा एमालेका नेता पदम गिरीले संघीय निजामती सेवा विधेयकमा गरिएको कुलिङ पिरियडसम्बन्धी हेरफेरलाई गम्भीर षड्यन्त्रको संज्ञा दिएका छन्। उनले यसमा संलग्न व्यक्तिहरूले नैतिकताको आधारमा पद छाड्नुपर्ने र कानुनी कारबाहीको सामना गर्नुपर्ने बताएका छन्।
सिंहदरबारमा पत्रकारहरूसँग कुराकानी गर्दै गिरीले भने, “कुलिङ पिरियडबारे समितिमा महिनौं छलफल भयो, दुई वर्ष राख्ने सहमति थियो। तर संसदबाट पास भएको प्रतिवेदनमा मुख्य सचिव, सचिव र सहसचिवलाई यो व्यवस्था लागू नहुने गरी परिवर्तन गरियो, जुन गम्भीर षड्यन्त्र हो।”
उनको भनाइमा यस्तो कार्यले संसद र समितिको गरिमा नष्ट गर्छ र यो अनैतिक र अस्वीकार्य छ। गिरीले स्पष्ट रूपमा भने, “यो उपहास हो — यस्तो गम्भीर लापरवाही भएकै हो भने दोषीमाथि निर्मम कारबाही हुनुपर्छ।”
यसबारे छानबिन नभएसम्म राज्य व्यवस्था समितिको बैठक सञ्चालन हुन नदिनेसमेत उनले चेतावनी दिएका छन्। उनले संसदीय प्रक्रियामा हुने विश्वासको गम्भीर संकट सिर्जना भएको बताएका छन्।
