काठमाडौं, साउन १७ — कैलाली जिल्लास्थित बर्दगोरिया गाउँपालिका–१ मा रहेको राजधानी सेकुवा एण्ड म:म सेन्टरमा काम गर्दै आएकी १७ वर्षीया किशोरी याचना सेजुवालको चक्कु प्रहारबाट हत्या गरिएको घटना सार्वजनिक भएको छ। प्रहरीका अनुसार सोही सेन्टरका कर्मचारी ३३ वर्षीय निरज साउदले शनिबार बिहान करिब १० बजे सेजुवालमाथि चक्कु प्रहार गरेका थिए।
घटनापछि गम्भीर घाइते भएकी सेजुवाललाई उपचारका लागि धनगढीको निसर्ग हस्पिटल लगिएको थियो, तर उपचारको क्रममा उनको मृत्यु भएको जिल्ला प्रहरी कार्यालय कैलालीका प्रवक्ता डीएसपी राजकुमार सिंहले जानकारी दिएका छन्।
सेजुवालको शव पोष्टमार्टमका लागि सेती प्रादेशिक अस्पतालमा राखिएको छ। घटनामा संलग्न भनिएका निरज साउदलाई प्रहरीले नियन्त्रणमा लिएको छ भने घटनाको कारण खुलेको छैन। हाल थप अनुसन्धान जारी रहेको प्रहरीको भनाइ छ।
