१० असार, काठमाडौं । खाडी मुलुकमा बढ्दो तनावको प्रभाव नेपालमा समेत देखिन थालेको छ। सोमबार रातिदेखि कतारसहितका खाडी मुलुकतर्फ जानुपर्ने उडानहरू आकस्मिक रूपमा रद्द भएपछि त्रिभुवन अन्तर्राष्ट्रिय विमानस्थलमा सयौं यात्रु अलपत्र परेका छन्।
नेपाल एयरलाइन्सको दोहातर्फ राति ११ बजे तय गरिएको उडान अन्तिम समयमा स्थगित गरिएपछि वैदेशिक रोजगारीका लागि कतार, युएई, साउदी अरब, कुवेतलगायत देश जान लागेका यात्रुहरू विमानस्थलमै रोकिए।
इरानले सोमबार राति कतारको राजधानी दोहामा हमला गरेको पुष्टि भएपछि तत्काल सुरक्षा संवेदनशीलता बढाउँदै कतारले आफ्नो हवाई क्षेत्र अस्थायी रूपमा बन्द गर्यो। त्यसको प्रत्यक्ष असर नेपालबाट हुने उडानमा परेको हो।
नेपाल एयरलाइन्स, हिमालयन एयरलाइन्स र कतार एयरवेजले आफ्ना उडानहरू रोक्ने निर्णय गरेपछि यात्रुहरूलाई बिना जानकारी रातभर विमानस्थलमै बस्नुपर्ने अवस्था आयो। कतिपय यात्रुहरू चिसो फ्लोरमा सुते भने केही खानपान र बासको अभावमा असहज अवस्थामा देखिए।
राति १ बजेतिर विमानस्थल सुरक्षा कर्मचारीहरूले यात्रुहरूलाई टर्मिनल क्षेत्रबाट बाहिर निकालेका थिए। कसैलाई वैकल्पिक बसोबासको व्यवस्था नगरिएको यात्रुहरूको गुनासो छ।
त्रिभुवन विमानस्थल कार्यालयका प्रवक्ताले बताए अनुसार कतारको आकाशमार्ग फेरि खुला भएसँगै आज मंगलबारदेखि खाडी तर्फका उडानहरू बिस्तारै सञ्चालनमा आउनेछन्। नेपाल एयरलाइन्सको दोहा उडान आज दिउँसो १२ बजेका लागि पुनः तालिका तय गरिएको छ।
