काठमाडौं, असार ३२ — दक्षिण गाजाको खान युनुस क्षेत्रमा रहेको जीएचएफ (गाजा ह्युम्यानिटेरियन फाउन्डेसन) सहायता वितरण केन्द्रमा मंगलबार ठूलो भागदौड हुँदा २० जनाको मृत्यु भएको छ।
जीएचएफका अनुसार १९ जना भीडमा किचिएर ज्यान गुमाए भने एक जनाको छुरा प्रहारबाट मृत्यु भएको हो। भीड नियन्त्रण गर्न नसकिएपछि अमेरिकी निजी सुरक्षाकर्मीहरूले केन्द्र बन्द गरेपछि अवस्था झन् भयावह बनेको प्रत्यक्षदर्शीहरूले बताएका छन्।
यसअघि खान युनुसको नासेर अस्पतालले १० वटा शव ल्याइएको जानकारी दिएको थियो।
मानवीय सहायता वितरण सुरु भएपछि गाजामा यस्ता घटनाहरू दोहोरिँदै आएका छन्। संयुक्त राष्ट्र मानव अधिकार कार्यालयका अनुसार पछिल्ला ६ हप्तामा गाजामा रहेका चार वटा सहायता केन्द्र वरिपरि ६७४ जनाको मृत्यु भइसकेको छ।
