काठमाडौं, जेठ २० – गाजामा राहत सामग्री वितरणको क्रममा सहायता लिन पुगेका प्यालेस्टिनी नागरिकहरूमाथि गोली प्रहार भएको घटनाप्रति संयुक्त राष्ट्रसंघका महासचिव एन्टोनियो गुटेरेसले गहिरो चिन्ता व्यक्त गरेका छन्। उनले उक्त घटनाको स्वतन्त्र छानबिन हुनुपर्ने माग गरेका छन्।
गुटेरेसले आइतबार वक्तव्य जारी गर्दै भने, “सहायता सामग्री लिन आएका निर्दोष नागरिकहरू ज्यान गुमाउनु अत्यन्त दुखद र निन्दनीय विषय हो। यस घटनाले गाजामा बढ्दो मानवीय संकट झनै भयावह बनाएको छ।”
घटनास्थलमा रहेका प्रत्यक्षदर्शीका अनुसार इजरायली सेनाले सहायता वितरण केन्द्रमा भीड जम्मा भएको समयमा गोली चलाएको बताएका छन्। उक्त केन्द्रमा अमेरिकाको समर्थन प्राप्त गाजाको एक सहायता संस्थाबाट राहत वितरण भइरहेको थियो।
अन्तर्राष्ट्रिय रेडक्रसले घटनामा १७९ जना गोली लागेर घाइते भएको पुष्टि गरेको छ भने, तीमध्ये २१ जनाको ज्यान गएको जनाएको छ। अर्कोतर्फ, हमासद्वारा सञ्चालित गाजाको स्वास्थ्य मन्त्रालयले ३१ जनाको मृत्यु भएको दाबी गरेको छ।
यस घटनाले गाजामा युद्धबिरामको माग, मानवअधिकार उल्लंघनको प्रश्न र सहायता सामग्रीको निष्पक्ष वितरणमा गम्भीर बहस चर्काएको छ। संयुक्त राष्ट्रसंघ लगायत अन्तर्राष्ट्रिय समुदायले नागरिकहरूको सुरक्षा सुनिश्चित गर्न सबै पक्षहरूलाई संयमता अपनाउन आग्रह गरेका छन्।
