काठमाडौं, भदौ २ — गाजामा जारी युद्ध रोक्न र हमासको नियन्त्रणमा रहेका इजरायली बन्धकको रिहाइका लागि इजरायली नागरिकहरू सडकमा उत्रिएका छन्। तेल अविवको ‘होस्टेजेस स्क्वायर’ मा आइतबार राति ठूलो भीड जम्मा भएको थियो।
प्रदर्शनकारीहरूले गाजामा युद्ध अन्त्य गर्न र बन्धक मुक्त गर्न सरकारसँग माग राखेका छन्। एक दिवसीय राष्ट्रिय हड्तालका कारण केही सडक अवरुद्ध भएका छन् र विश्वविद्यालयहरू बन्द भएका छन्। प्रदर्शनका क्रममा करिब ४० जनालाई नियन्त्रणमा लिइएको छ।
विरोध प्रदर्शनका आयोजकहरूले चेतावनी दिएका छन् कि हमाससँग रहेका बन्धकको ज्यान खतरामा छ। उनका अनुसार गाजा शहरमा नियन्त्रणको प्रयासले २० जना बन्धकको जीवनमा जोखिम पैदा भएको छ।
तर, इजरायली प्रधानमन्त्री बेन्जामिन नेतान्याहुले प्रदर्शनको आलोचना गरेका छन्। उनले भनेका छन् कि यस्ता प्रदर्शनले हमासको मनोबल बढाउनेछ र बन्धकको रिहाइमा ढिलाइ हुन सक्छ।
सन् २०२३ को अक्टोबर ७ मा हमासले इजरायलमा गरेको आक्रमणपछि गाजामा युद्ध सुरु भएको थियो। यस आक्रमणमा १,२१९ इजरायली मारिएका थिए, जसमा १० नेपाली विद्यार्थी पनि थिए। त्यस्तै, हमासले २५१ जनालाई बन्धक बनाएको थियो, जसमा एक नेपाली विद्यार्थी समेत छन्। गाजामा इजरायलको हवाई आक्रमणमा हालसम्म ६१ हजारभन्दा बढी प्यालेस्टिनीको मृत्यु भएको गाजा स्वास्थ्य मन्त्रालयले जनाएको छ।
