काठमाडौं, असार ३२ — चर्चित कलाकार नाजिर हुसेनले आफ्नो नयाँ फिल्म ‘गुन्यो चोलो’ मा फरक र अनौठो अवतार लिएर दर्शकहरूलाई प्रभावित बनाउने तयारीमा छन्। उनले यस फिल्ममा यौनिक तथा लैंगिक अल्पसँख्यक समुदायको पात्र निभाउनेछन्, जसले दर्शकहरूमा उत्सुकता बढाएको छ।
निर्माण टिमले हालै फिल्मको ‘म फूल हुँ कि काँडा’ बोलको गीत सार्वजनिक गरेको छ, जसमा नाजिरलाई महिला अवतारमा देखाइएको छ। रातो लेहेंगा र पूरा श्रंगारमा सजिएका उनका यो अवतारले प्रशंसकहरूको धेरै ध्यान तानेको छ।
यो फिल्म भदौ १३ गतेबाट प्रदर्शनमा आउने तयारीमा छ। समुन्द्र भट्टको निर्देशन रहेको ‘गुन्यो चोलो’ले लैंगिक अल्पसंख्यकहरूको कथालाई मुख्य विषय बनाएको छ।
फिल्ममा नाजिरको साथै सञ्चिता लुइँटेल, राजकुमार घोष, शिशिर राणा, अनुपम श्रेष्ठ र विशाल पहारीजस्ता कलाकारहरूले पनि मुख्य भूमिका निर्वाह गरेका छन्।
