काठमाडौँ, असार २४ — चिकित्सकहरूले उठाएको माग सम्बोधन गर्न सरकार र आन्दोलनरत चिकित्सकबीच मंगलबार साँझ संवाद सुरु भएको छ। स्वास्थ्य तथा जनसंख्या मन्त्रालयमा बसेको वार्तामा दुबै पक्ष समाधानका बाटो खोज्न तयार देखिएका छन्।
नेपाल चिकित्सक संघको नेतृत्वमा चिकित्सकहरू आन्दोलनमा उत्रिएको केही दिन भइसकेको छ। उपभोक्ता अदालतले तीन वटा छुट्टाछुट्टै मुद्दामा चिकित्सकीय लापरबाही ठहर गर्दै अस्पताल र सम्बन्धित चिकित्सकलाई क्षतिपूर्ति तिर्न आदेश दिएको विषयलाई लिएर उनीहरू आक्रोशित छन्।
यसै क्रममा मंगलबार चिकित्सकहरूले माइतीघर मण्डलामा प्रदर्शन गरे। यसअघि सोमबार उनीहरूले देशभर आकस्मिक सेवा बाहेकका सबै स्वास्थ्य सेवा बन्द गरेका थिए। उनीहरूले अबको कदमस्वरूप नेपाल मेडिकल काउन्सिलमा आफ्नो प्रमाणपत्र बुझाउने चेतावनी पनि दिएका छन्।
चैतमा गठन भएको उपभोक्ता अदालतमा हालसम्म १५ वटा मुद्दा दर्ता भएका छन्, जसमध्ये पाँचवटा स्वास्थ्य उपचारसँग सम्बन्धित छन्। चिकित्सक संघको भनाइ छ—उपचारसम्बन्धी विषयमा निर्णय गर्ने अधिकार मेडिकल काउन्सिलसँग हुनु पर्ने हुँदा उपभोक्ता संरक्षण ऐनमा संशोधन आवश्यक छ।
वार्ताबाट समस्या समाधानको केही आशा देखिएको छ, तर ठोस सहमति अझै नजोडिएको अवस्था छ।
