नेपाल पर्यटन बोर्डले चीनमा आयोजना गरेको पर्यटन प्रवर्धन कार्यक्रममा एआई द्वारा निर्मित फोटो प्रयोग गरेको विषय सामाजिक सञ्जालमा व्यापक आलोचनाको विषय बनेको छ। बोर्डले नेपाल-चीन कूटनीतिक सम्बन्धको ७० औं वर्षगाँठको अवसरमा बेइजिङमा आयोजना गरेको कार्यक्रममा देखाइएको फोटो मौलिक नभई कृत्रिम बुद्धिमत्ताको माध्यमबाट सिर्जना गरिएको पाइएको छ। यसले नेपालका लागि नकारात्मक प्रभाव पार्दै सामाजिक सञ्जालमा धेरैले आलोचना गरेका छन्।
धेरै सामाजिक सञ्जाल प्रयोगकर्ताहरूले पर्यटन बोर्डले नेपालको मौलिकता, संस्कृति, प्रकृति र पहिचानलाई प्रस्तुत गर्ने अवसर गुमाएको आरोप लगाएका छन्। उनीहरूले एआईले सिर्जना गरेका सामान्यस्तरका तस्वीरलाई औपचारिक अन्तर्राष्ट्रिय कार्यक्रममा प्रयोग गर्नु लाजमर्दो भएको प्रतिक्रिया दिएका छन्। अरनिको फाउण्डेशनकी सह-संस्थापक एनेकाले ट्विटरमा लेख्दै, तस्वीरमा कुनै सिर्जनात्मकता, मिहिनेत वा सन्देश नदेखिएको बताइन्। साथै, कार्यक्रम चिनियाँ दर्शक लक्षित हुँदाहुँदै पनि अंग्रेजी भाषामा सामग्री प्रस्तुत गरिएको, त्यसमा सतही जानकारी मात्रै राखिएको र प्रस्तुति नै “अल्छी” ढंगको भएको उल्लेख गरिएको छ।
यसबाहेक, नेपाल पर्यटन बोर्डको आधिकारिक वेबसाइटमा कर्मचारी विवरण, पोर्टफोलियो वा सांगठनिक संरचनाको अभाव देखिएको र संचारका लागि एक मात्र फोन नम्बर रहेको पनि आलोचना गरिएको छ। बुझ्दा हाल सूचना अधिकारी पनि बोर्डमा कोही नरहेको जानकारी प्राप्त भएको छ।
यस घटनाले नेपाल सरकारको कूटनीतिक र प्रवर्द्धनात्मक कार्यक्रमप्रति तयारी, संवेदनशीलता र दृष्टिकोणबारे प्रश्न उठाएको छ। आलोचकहरूका अनुसार यस्तो गैरजिम्मेवार कार्यले अन्तर्राष्ट्रिय स्तरमा नेपालको प्रतिष्ठा प्रभावित गर्न सक्छ।
