काठमाडौं, साउन २० — चीनमा चिकुनगुनिया भाइरसका संक्रमितहरूको संख्या सात हजार नाघेको छ। गुवाङदोङ प्रान्तमा यो रोग फैलिन थालेपछि स्थानीय सरकारले कोभिड–१९ महामारीका बेला अपनाइएका जस्ता कडाइका उपायहरू पालना गर्न सबैलाई आग्रह गरेको छ।
सबैभन्दा बढी प्रभावित फोसान सहर हो जहाँ संक्रमितहरूलाई अस्पतालमा राखेर उपचार भइरहेको छ। यस बाहेक गुवाङदोङका कम्तीमा १२ अन्य सहरमा पनि संक्रमित भेटिएका छन्। गत हप्ता मात्र संक्रमितको संख्या तीन हजारले बढेको थियो।
चिकुनगुनिया लामखुट्टेको टोकाइबाट सर्ने रोग हो जसमा बिरामीलाई ज्वरो र जोर्नी दुख्ने समस्या देखा पर्छ। कतिपयलाई यसका लक्षण वर्षौंसम्म रहन सक्छन्। बिरामीहरूको परीक्षण नतिजा नेगेटिभ आएपछि मात्र अस्पतालबाट डिस्चार्ज गरिन्छ भने कतिपयलाई एक हप्तासम्म उपचारमा राखिनुपर्छ।
यो रोग चीनमा कम देखिए पनि दक्षिण तथा दक्षिणपूर्वी एसिया र अफ्रिकाका केही क्षेत्रहरूमा बढी फैलिएको छ। स्थानीय प्रशासनले तत्काल नियन्त्रणका लागि सचेतना र सुरक्षा उपायहरू कडा बनाउन आग्रह गरेको छ।
