काठमाडौं, साउन १३ — जनसंख्याको घट्दो दरबाट चिन्तित चीन सरकारले परिवारहरूलाई थप बच्चा जन्माउन प्रेरित गर्ने उद्देश्यले आर्थिक सहायता दिने नीति सार्वजनिक गरेको छ। अबदेखि ३ वर्षभन्दा कम उमेरका प्रत्येक सन्तानको लागि अभिभावकले वार्षिक ५०० अमेरिकी डलरसम्म अनुदान पाउने छन्।
यो सहायता योजना देशभरका २ करोड घरपरिवारलाई लक्षित गरी ल्याइएको हो, जसअनुसार प्रति सन्तान १०,८०० युआनसम्मको सहयोग उपलब्ध हुनेछ। सरकारी अधिकारीहरूले यो कार्यक्रम सन् २०२४ को अन्त्यसम्म बच्चा जन्माएका अभिभावकलाई उपलब्ध गराउने बताएका छन्। यो वर्षकै शुरूवातदेखि रकम गणना गरिने भएकाले, योजना तुरुन्तै प्रभावकारी हुने छ।
एक समय ‘एक सन्तान नीति’ लागू गरेर जनसंख्या नियन्त्रणमा कडा कदम चालेको चीन अहिले जनसांख्यिक सन्तुलनका लागि आर्थिक प्रोत्साहनको बाटोमा लागेको छ। विवाहमा ढिलाइ, महँगो जीवनशैली र करियर प्राथमिकताको कारण अहिलेका युवाहरू सन्तान जन्माउन हिच्किचाउने गरेको विश्लेषणकर्ताहरू बताउँछन्।
यसअघि देशका केही शहरहरूले स्थानीयस्तरमा आर्थिक सहुलियत दिने प्रयास गरेका थिए—जस्तै होह्हत शहरले प्रति सन्तान १ लाख युआन दिने योजना ल्याएको थियो भने शेनयाङ सहरले तेस्रो सन्तान भएकालाई मासिक ५०० युआन दिने घोषणा गरिसकेको थियो। तर, यो भने पहिलोपटक संघीय सरकार स्तरबाट ल्याइएको ठूला परिमाणको राष्ट्रव्यापी योजना हो।
विशेषज्ञहरू भन्छन्, यदि योजनाले प्रभावकारी ढंगले कार्यान्वयन पायो भने चीनको घट्दो जन्मदरलाई रोक्न यसले उल्लेखनीय भूमिका खेल्न सक्छ।
