काठमाडौं, साउन १९ – राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले सोमबार पनि प्रतिनिधिसभाको बैठक बहिष्कार गरेका छन्। भिजिट भिसाको नाममा भइरहेको मानव तस्करी प्रकरणमा गम्भीर अनुसन्धान हुनुपर्ने माग गर्दै दुवै दलले लामो समयदेखि संसदमा दबाव दिँदै आएका छन्।
आजको बैठकमा दुवै पार्टीका सांसदहरूले बैठक सुरु हुनासाथ उठेर आपत्ति जनाए र आफ्ना भनाइहरू राखेपछि सदनबाट बाहिरिए। उनीहरूले या त संसदीय विशेष छानबिन समिति वा स्वतन्त्र न्यायिक संयन्त्रमार्फत निष्पक्ष अनुसन्धान हुनुपर्नेमा जोड दिए।
रास्वपाकी सांसद शोबिता गौतमले सरकारप्रति असन्तुष्टि जनाउँदै भनिन्, “सरकार गम्भीर देखिँदैन, जबसम्म भिजिट भिसा प्रकरणमा निष्पक्ष र उच्चस्तरीय छानबिन हुँदैन, हाम्रो विरोध जारी रहन्छ।”
राप्रपाका सांसद ज्ञानबहादुर शाहीले पनि यस्तै अडान राखे। उनले भिजिट भिसाको नाममा भइरहेको अवैध गतिविधि सामान्य नभएको बताउँदै सरकारको निष्क्रियता र छानबिनमा देखिएको ढिलासुस्तीप्रति आपत्ति जनाए। “हामी सरकारविरुद्ध होइनौं, तर मानव तस्करीविरुद्ध दृढतापूर्वक उभिएका छौं,” उनले भने।
यसैबीच, राप्रपाका अर्का नेता ध्रुवबहादुर प्रधानले प्रधानमन्त्रीकै तर्फबाट आएको ‘संविधान विरोधी’ र ‘व्यवस्था विरोधी’ भन्ने आरोपप्रति गम्भीर आपत्ति जनाउँदै स्पष्ट पारे, “हामी समस्या होइन, समाधान खोज्ने दल हौं, जनताको आवाज उठाइरहेका छौं र संसद चलाउन तयार पनि छौं।”
तर, सत्तापक्ष भने यस्ता निरन्तर विरोधले संसदको कार्यसम्पादन प्रभावित भएको बताउँदै आएको छ। कांग्रेस प्रमुख सचेतक श्यामकुमार घिमिरेले संसदलाई अवरोध गर्ने शैली अनुचित भएको टिप्पणी गर्दै थप प्रतिवादका संकेत दिएका छन्।
रास्वपा र राप्रपा दुवैले भिजिट भिसा प्रकरणमा सत्य उजागर नहुञ्जेल सदनमा बहिष्कार र विरोध जारी राख्ने स्पष्ट संकेत गरेका छन्। घटनाको गम्भीरता र राजनीतिक दबाबबीच छानबिन समिति गठनको माग अब संसदीय बहसको केन्द्रबिन्दुमा आएको छ।
