काठमाडौं, भदौ १७ – आउँदो प्रतिनिधिसभा सदस्य उपनिर्वाचनमा रुपन्देही क्षेत्र नं. ३ बाट जनमत पार्टीले धनिराम चौधरीलाई आधिकारिक उम्मेदवार बनाउने निर्णय गरेको छ।
पार्टीका राष्ट्रिय सचिव भूपेन्द्र यादवका अनुसार केन्द्रीय सचिवालयको बैठकले चौधरीलाई उम्मेदवार बनाउने प्रस्ताव पारित गरेको हो।
सियारी गाउँपालिकाका स्थायी वासिन्दा चौधरी यसअघि नागरिक उन्मुक्ति पार्टीसँग आबद्ध थिए। उनी सोही पार्टीबाट रुपन्देही–१ मा प्रतिनिधिसभा निर्वाचन लडेका थिए। तर, केही महिनाअघि नागरिक उन्मुक्ति पार्टी त्यागेर उनले जनमत पार्टीमा प्रवेश गरेका थिए।
जनमत पार्टीका अध्यक्ष डा. सीके राउत रुपन्देही भ्रमणमा जाँदा चौधरीलाई औपचारिक रुपमा पार्टीमा स्वागत गराएका थिए। अब पार्टी नेतृत्वले उनलाई रुपन्देही–३ उपनिर्वाचनमा उम्मेदवार बनाउने जिम्मेवारी दिएको छ।
