२० साउन, काठमाडौं — भूमि व्यवस्थामन्त्री बलराम अधिकारीले पछिल्लो समय सार्वजनिक भएका अडियो क्लिपहरूमाथि प्रतिक्रिया दिँदै आफूले कसैलाई पनि करकापमा पारी रकम नमागेको दावी गरेका छन्। पोखराको चर्चित लिचीबारी जग्गा प्रकरणसँग जोडिँदै आएको विषयमा मन्त्री अधिकारीले आफूलाई कुनै संलग्नता नभएको दाबी गरेका हुन्।
उनले स्पष्ट रूपमा भनेका छन्, “आजसम्म मैले कसैलाई दबाब दिई रकम मागेको छैन, न त लिचीबारी जग्गाबारे अडियो बाहिरिनुअघि केही थाहा थियो।” उनले सामान्य प्रशासनमन्त्री राजकुमार गुप्तासँग जोडिएको अडियो सार्वजनिक भएपछिमात्र उक्त प्रकरणबारे आफू जानकार भएको बताए।
उक्त अडियोहरूमा भूमि आयोग अध्यक्ष पदका लागि चलखेल र आर्थिक लेनदेनबारे कुरा भएको उल्लेख छ। अडियोमा मन्त्री अधिकारीको नाम पनि उल्लेख छ भन्ने दाबी भए पनि उनले त्यसलाई अस्वीकार गर्दै भने, “म भूमिसम्बन्धी पार्टीको जिल्ला कमिटीको सिफारिसअनुसार काम गर्छु, पैसा खानुको कुनै प्रसंग नै आउँदैन।”
त्यस्तै, अर्काे अडियोमा एक कर्मचारीले ७० लाख रुपैयाँ खर्च भएको दाबी गरेका छन्, तर उक्त अडियोमा मन्त्रीले प्रत्यक्ष रकम लिएको प्रमाण भने छैन। यसअघि आयोजित पत्रकार सम्मेलनमा मन्त्री अधिकारीले भनेका थिए, “जाँड खाएर कोहीले बोलेको भरमा कसैलाई दोषी देखाउन मिल्दैन।”
उनले दुई व्यक्तिले मिलेर तेस्रो निर्दोष व्यक्तिको नाम मुछ्ने प्रयास गरिरहेको आरोप पनि लगाएका छन्। मन्त्री अधिकारीले सार्वजनिक भएका आरोपप्रति आपत्ति जनाउँदै आफूलाई गलत रूपमा प्रस्तुत गरिएको गुनासो गरेका छन्।
