२४ असार, काठमाडौं — चालु आर्थिक वर्षको जेठ महिनामा नेपालमा रेमिट्यान्सको भित्राइमा नयाँ रेकर्ड कायम भएको छ। चालु आर्थिक वर्षको जेठ महिनामा वैदेशिक रोजगारबाट नेपालमा भित्रिएको रेमिट्यान्स रकम अघिल्लो महिनाको तुलनामा उल्लेखनीय रूपमा बढेर १ खर्ब ७६ अर्ब ३२ करोड रुपैयाँ पुगेको छ। यो रकम वैशाखको तुलनामा करिब १० अर्बले बढी हो।
नेपाल राष्ट्र बैंकले सार्वजनिक गरेको तथ्यांकअनुसार, साउनदेखि जेठसम्मको ११ महिनाको अवधिमा रेमिट्यान्स आप्रवाह कुल १५ खर्ब ३२ अर्ब ९३ करोड रुपैयाँ पुगेको छ, जुन अघिल्लो वर्षको सोही अवधिको तुलनामा १५.५ प्रतिशतले वृद्धि भएको हो। यस्तै, अमेरिकी डलरमा हेर्दा सो अवधिमा विप्रेषण १२.७ प्रतिशतले बढेको छ।
अमेरिकी डलरमा पनि रेमिट्यान्स आप्रवाहमा वृद्धि देखिएको छ, जहाँ चालु आर्थिक वर्षको ११ महिनामा १२.७ प्रतिशतले वृद्धि भई ११ अर्ब २५ करोड डलर पुगेको छ। कुल रूपमा, चालु आर्थिक वर्षको ११ महिनामा खुद द्वितीय आय १६ खर्ब ६८ अर्ब ३० करोड रुपैयाँ पुगेको छ, जुन अघिल्लो वर्षको तुलनामा धेरै हो।
पछिल्लो समय वैदेशिक रोजगारीमा जाने नेपालीको संख्यामा समेत वृद्धि देखिएको छ। यस आर्थिक वर्षको जेठसम्म अन्तिम श्रम स्वीकृति लिनेको संख्या ४ लाख ५२ हजार पुगेको छ, भने पुनः श्रम स्वीकृति लिने ३ लाखभन्दा बढी नेपाली रहेका छन्।
