काठमाडौं, भदौ ३१ – जेनजी आन्दोलनका क्रममा आगजनी र तोडफोडले क्षतिग्रस्त भएका काठमाडौं उपत्यकाका विभिन्न प्रहरी कार्यालयहरूलाई दाताहरूले सहयोग पुर्याउन थालेका छन्। यसैक्रममा नासा सेक्युरिटीज ब्रोकर नम्बर ५८ले दरबारमार्ग प्रहरी कार्यालयलाई तीन सेट कम्प्युटर, तीन सेट प्रिन्टर र तीन सेट टेबल-कुर्सी प्रदान गरेको छ।
त्यसैगरी व्यक्तिगत लगानीकर्ता छोटेलाल रौनियारले कालीमाटी प्रहरी कार्यालयलाई समान सामग्री सहयोग गरेका छन्। उनलाई सहयोग हस्तान्तरण कार्यक्रममा काठमाडौं महानगरपालिका वडा नम्बर १३ का अध्यक्ष ध्रुव मानन्धर र धर्मशरण मानन्धर लगायत सहभागी थिए।
यसैगरी, पठाओ नेपालले नयाँबानेश्वर प्रहरी कार्यालयलाई, र जोय नेपाल फाउन्डेसनले स्वयम्भु प्रहरी कार्यालयलाई सहयोग गरेको जनाइएको छ। यी संस्थाले पनि प्रत्येक कार्यालयमा तीन–तीन सेट कम्प्युटर, प्रिन्टर र टेबल–कुर्सी उपलब्ध गराएका छन्। अर्कोतर्फ, मिलारेपा मेडिटेसन भिलेज प्रालिले साँखु प्रहरी कार्यालयलाई ४० थान ब्ल्यांकेट र ५ थान ग्यास सिलिण्डर सहयोग गरेको छ।
जेनजी आन्दोलनका क्रममा भएको आगजनी र तोडफोडका कारण कतिपय प्रहरी कार्यालयहरू पूर्ण रूपमा क्षतिग्रस्त भएका थिए। केही प्रहरीले आफ्नो व्यक्तिगत लुगाबाहेक अन्य सामग्री सुरक्षित गर्न सकेका थिएनन्।
सामाजिक सुरक्षामा प्रहरीहरूको भूमिका महत्वपूर्ण भएकाले विभिन्न व्यक्तित्व र संस्थाहरूले प्रहरीको पुनर्स्थापना र कार्यक्षमता सुनिश्चित गर्न सहयोगको क्रम जारी राखेको छ। कतिपयले कार्यालय सरसफाइ, रंगरोगन र भौतिक सामग्री उपलब्ध गराएर प्रहरीहरूको मनोबल उच्च राख्ने प्रयास पनि गरिरहेका छन्।
