२३ भदौ, काठमाडौं । सामाजिक सञ्जाल बन्दविरुद्ध भएको जेनजीको प्रदर्शन थप उग्र बनेसँगै मृत्यु हुनेको संख्या बढ्दै गएको छ। सिभिल अस्पतालमा उपचाररत एक प्रदर्शनकारीको मृत्यु भएपछि हालसम्म १४ जनाको ज्यान गएको पुष्टि भएको छ।
स्वास्थ्य तथा जनसंख्या मन्त्रालयका अनुसार दिउँसो साढे ३ बजेसम्म १३ जनाको मृत्यु भइसकेकोमा बेलुकी सिभिल अस्पतालमा थप एकजनाको मृत्यु भएपछि संख्या १४ पुगेको हो।
मन्त्रालयले दिएको विवरणअनुसार, ट्रमा सेन्टरमा ६ जना, सिभिल अस्पतालमा ३ जना, केएमसी अस्पतालमा १ जना, त्रिवि शिक्षण अस्पतालमा १ जना र एभरेष्ट अस्पतालमा ३ जनाको मृत्यु भएको छ।
यद्यपि घाइतेहरूको विस्तृत तथ्यांक भने अझै आइसकेको छैन। अवस्था गम्भीर भएकाले मृतक संख्या अझ बढ्ने आशंका पनि गरिएको छ।
