काठमाडौं, ३० जेठ — तीनकुनेस्थित हिंसात्मक घटनामा संलग्न रहेको अभियोगमा दुर्गा प्रसाईंसहित सात जनालाई काठमाडौं जिल्ला अदालतले थुनामा पठाउने आदेश दिएको छ। न्यायाधीश ध्रुबराज कार्कीको इजलासले राज्यविरुद्धको गतिविधि, आगजनी, र पत्रकार हत्या अभियोगमा उनीहरूलाई पुर्पक्षका लागि थुनामा राख्न आदेश दिएको हो।
थुनामा पठाइएका व्यक्तिहरूमा दुर्गा प्रसाईंसँगै सरोज गौतम, गोकर्ण शाही, डण्डपाणि रेग्मी, शुसिल बराल, केशव बस्नेत, र जितबहादुर श्रेष्ठ छन्। तीमध्ये केही व्यक्तिमाथि पत्रकार सुरेश रजकको मृत्युमा संलग्न रहेको आरोप पनि छ।
घटना गत चैत १५ गते पूर्वराजाको समर्थनमा आयोजित प्रदर्शनका क्रममा भएको हो। प्रदर्शनकारीहरूले तीनकुनेस्थित “सुनौलो इन्द्रेणी बचत तथा ऋण सहकारी संस्था”को भवनमा आगजनी गरेका थिए। त्यसै भवनमा समाचार संकलनका लागि पुगेका पत्रकार सुरेश रजकको ज्यान गएको थियो। सो सहकारी संस्थाको नेतृत्व प्रेम बहादुर श्रेष्ठले गर्दै आएका थिए।
प्रहरी अनुसन्धानका अनुसार, आगजनीमा रामेछापका सरोज गौतम र अछामका गोकर्ण शाहीको प्रत्यक्ष संलग्नता देखिएको छ। राज्यविरुद्धको आपराधिक गतिविधिमा संलग्न भएको पुष्टि भएपछि अदालतले उनीहरूलाई थुनामा राख्न आदेश दिएको हो।
