काठमाडौं, असोज ६ — दसैं नजिकिएसँगै उपत्यकाबाट घर फर्किने यात्रुको भीड दिनदिनै बढिरहेको छ। पछिल्लो पाँच दिनमा मात्र काठमाडौँ उपत्यकाबाट १ लाख ८९ हजारभन्दा बढी यात्रु बाहिरिएका छन्।
काठमाडौँ उपत्यका ट्राफिक प्रहरी कार्यालयका अनुसार असोज १ देखि ५ गतेसम्म २९ हजार ३६० सार्वजनिक सवारीसाधनमार्फत १ लाख ८९ हजार २१८ यात्रु गन्तव्यतर्फ प्रस्थान गरेका हुन्। असोज १ गते ३४ हजार ५५६, असोज २ गते ३६ हजार १००, असोज ३ गते ४० हजार ५५५, असोज ४ गते ३४ हजार ८७९ र असोज ५ गते ४३ हजार १२४ यात्रु उपत्यकाबाट बाहिरिएका छन्।
प्रहरी नायब उपरीक्षक लोकेन्द्रसिंह गुरुले उपत्यकामा अध्ययन, व्यापार, व्यवसाय र रोजगारीका लागि बसोबास गरिरहेका नागरिक चाडपर्व मनाउन आफ्ना घरतर्फ गइरहेको जानकारी दिए। ती यात्रुहरू मुख्यत: थानकोट, साँगा, दक्षिणकाली र बालाजु नाकामार्फत बाहिरिएको जनाइएको छ।
यात्रामा भने सहजता छैन। नेपाल यातायात व्यवसायी राष्ट्रिय महासंघका महासचिव डेकनाथ गौतमका अनुसार बर्खाका कारण विभिन्न राजमार्गमा पहिरो खस्दा सवारीसाधन लामो समयसम्म बाटोमै अल्झिनु परेको छ। मुग्लिङ–नारायणघाट सडकखण्डमा अवरोध हुँदा घण्टौँसम्म गाडी रोकिँदा यात्रुहरूलाई समयमै गन्तव्य पुग्न कठिन भएको उनले बताए। उनले सडक सञ्चालनलाई नियमित र छिटो बनाउन सरकारलाई आग्रह गरे।
यसैबीच, काठमाडौँको नयाँ बसपार्कमा यात्रुको चाप तीव्र रूपमा बढेको छ। सामान्य दिनमा दैनिक ४–५ हजार यात्रु बसपार्कबाट बाहिरिने गरे पनि अहिले त्यो संख्या बढेर १५ हजारभन्दा बढी पुगेको लोत्से बहुउद्देश्यीय प्रालिका मानव संसाधन प्रमुख पङ्कज मल्लले जानकारी दिए।
