काठमाडौँ, भदौ २ – चर्चित व्यवसायी दुर्गा प्रसाईँले फेरि एकपटक कडा चेतावनी दिएका छन्। सोमबार काठमाडौँमा आयोजना गरिएको पत्रकार सम्मेलनमा उनले आफूलाई जेल र हिरासत कुनै नयाँ कुरा नभएको बताउँदै, “मेरो समय आएपछि बदमासहरूलाई भाग्ने ठाउँ हुँदैन” भनेर स्पष्ट सन्देश दिएका छन्।
७८ दिनसम्म हिरासतमा बिताएको अनुभव सुनाउँदै प्रसाईँले भने, “त्यो मेरो दिन थिएन, त्यसैले जेल सहनुपर्यो। तर जब मेरो दिन आउँछ, सत्य बोल्नेहरूको समय आउँछ, दलाल र भ्रष्टहरूलाई कतै लुक्ने मौका हुँदैन।”
उनले आफूलाई किन्न खोजिएको, दबाबमा पार्न खोजिएको तर नझुकेको दाबी पनि गरे। “यदि म भागेको भए, इन्काउन्टरमा मारिन्थेँ। तर मैले निर्णय गरेको छु– भाग्दिनँ, सत्यका लागि लड्छु,” उनले भने।
प्रसाईँले दलाल प्रवृत्ति र अनैतिक राजनीतिक चलखेलविरुद्ध आफू निरन्तर बोलिरहने बताएका छन्। उनले भने, “यो देश दलालहरूले सजिलोसँग चलाइरहेका छन्, तर एकदिन सर्वसाधारण, श्रमिक र भुइँमान्छेको दिन आउनेछ।”
