काठमाडौं, ३० जेठ २०८२ — नेपाली कांग्रेसका सभापति शेरबहादुर देउवाले पार्टी समावेशी लोकतन्त्रको व्यवहारिक अभ्यासमा प्रतिबद्ध रहेको बताएका छन्। शुक्रबार सानेपास्थित पार्टी कार्यालयमा आयोजित एक कार्यक्रममा बोल्दै उनले सबै तह र तप्काको प्रतिनिधित्व सुनिश्चित गर्नुपर्ने आवश्यकता औँल्याए।
कार्यक्रम राष्ट्रिय लोकतान्त्रिक अपाङ्ग संघको आयोजनामा भएको थियो। सो अवसरमा देउवाले अपाङ्गता भएका व्यक्तिहरूको राजनीतिक सहभागिता सुनिश्चित गर्न विशेष कार्यक्रमहरू सञ्चालन गर्नुपर्नेमा जोड दिए। उनले कांग्रेस पार्टीको घोषणापत्र र नीति दस्तावेजमा अपाङ्गता सम्बन्धी विषयवस्तु स्पष्ट र मजबुत रूपमा समेटिनु पर्ने धारणा व्यक्त गरे।
देउवाले भने, “अबको राजनीति काममा केन्द्रित हुनुपर्छ, केवल भाषणबाट कुरा अघि बढ्दैन। कार्यान्वयन नै परिवर्तनको प्रमुख सर्त हो।” उनले समावेशी नेतृत्व विकासका लागि “ब्यारियर-फ्री लिडरशिप” कार्यक्रम विस्तार गर्नुपर्ने बताए। यसका साथै, पार्टीको केन्द्रीय कार्यालयलाई पूर्णरूपमा अपाङ्गमैत्री बनाउने प्रतिबद्धता पनि उनले दोहोर्याए।
कार्यक्रममा देउवाले समावेशी मूल्य र मान्यतालाई व्यवहारमा लागू गरेर मात्र लोकतन्त्र सुदृढ हुने उल्लेख गरे। उनका अनुसार, कांग्रेसले सामाजिक विविधता, समता, र सहभागितामूलक दृष्टिकोणलाई अघि बढाउने कार्यलाई निरन्तरता दिनेछ।
