काठमाडौं, भदौ ११ — भुटानमा जारी साफ यू-१७ महिला च्याम्पियनसिपमा नेपालले उपाधिको आशा समाप्त गरेको छ। बुधबार थिम्पुको चाङ्लिमिथाङ रंगशालामा भएको खेलमा नेपाल बंगलादेशसँग ४–१ ले पराजित भयो।
खेलको सुरुवाती आधा घण्टापछि बंगलादेशले लगातार दुई गोल गर्दै अग्रता लिएको थियो। इन्जुरी समयमा नेपालले एक गोल फर्काए पनि पहिलो हाफ २–१ को अवस्थामा टुंगिएको थियो। तर दोस्रो हाफमा बंगलादेश झन् प्रभावकारी देखियो। ७३औं र ८७औं मिनेटमा थप दुई गोल गर्दै उसले ४–१ को सहज जित दर्ता गर्यो। बंगलादेशका लागि सोरभी अखण्ड प्रीतिले ह्याट्रिक समेत गरिन्।
यसअघि नेपालले उद्घाटन खेलमा भारतसँग ७–० ले हार व्यहोरेको थियो भने दोस्रो खेलमा भुटानलाई २–१ ले पराजित गरेको थियो। तर तेस्रो खेलमा पुनः हार भोगेपछि नेपालको अभियान उपाधि होडमै समाप्त भएको छ।
चार टोली सहभागी प्रतियोगितामा (भारत, बंगलादेश, नेपाल र आयोजक भुटान) लिग चरणको आधारमा सर्वाधिक अंक जोडेका टिमलाई उपाधि प्रदान गरिने नियम छ।
