२८ भदौ, काठमाडौं । नेपालमा नयाँ अन्तरिम सरकार गठन भएपछि छिमेकी मुलुक भारतले आधिकारिक रूपमा स्वागत गरेको छ। शुक्रबार पूर्वप्रधानन्यायाधीश सुशीला कार्कीले प्रधानमन्त्री पदको शपथ लिएर अन्तरिम सरकारको नेतृत्व सम्हालेलगत्तै भारतीय विदेश मन्त्रालयले विज्ञप्ति जारी गर्दै नयाँ सरकारलाई आफ्नो शुभेच्छा प्रकट गरेको हो।
भारतले जारी गरेको विज्ञप्तिमा कार्की नेतृत्वको सरकारले नेपालको शान्ति र राजनीतिक स्थिरता कायम गर्न महत्वपूर्ण योगदान दिने विश्वास व्यक्त गरिएको छ। विज्ञप्तिमा भनिएको छ, “हामी सुशीला कार्कीको नेतृत्वमा बनेको अन्तरिम सरकारलाई स्वागत गर्दछौं। हामीलाई अपेक्षा छ कि यसले नेपालको शान्ति, स्थिरता र लोकतान्त्रिक प्रक्रियामा टेवा पुर्याउनेछ।”
विदेश मन्त्रालयले नेपाल–भारतबीचको ऐतिहासिक सम्बन्धलाई स्मरण गर्दै आपसी सहकार्य र साझेदारीलाई अझ प्रगाढ बनाउन तयार रहेको पनि उल्लेख गरेको छ। भारतले नेपालको आर्थिक समृद्धि, सामाजिक विकास र लोकतान्त्रिक अभ्यासमा निरन्तर सहयोग गर्ने प्रतिबद्धता दोहोर्याएको छ।
नेपालमा पछिल्ला राजनीतिक घटनाक्रमका कारण सरकार ढलेपछि पहिलोपटक अन्तरिम प्रधानमन्त्रीका रूपमा सुशीला कार्कीलाई नियुक्त गरिएको हो। यस घटनालाई भारतले समयमै सम्बोधन गर्दै सकारात्मक सन्देश पठाउनु दुई मुलुकबीचको कूटनीतिक नातालाई अझ मजबुत बनाउने संकेतको रूपमा हेरिएको छ।
