काठमाडौं, भदौ १० — रसुवामा डेढ महिनाअघि आएको बाढीले मितेरी पुल बगाएको घटनापछि नेपाल-चीन व्यापारिक नाकामा समस्या देखिएको छ। उक्त ठाउँमा तत्काल बेलिब्रिज निर्माण गर्ने तयारी भइरहेको छ।
चिनियाँ पक्षले ८१ जना कामदार, आवश्यक उपकरण र सामग्री ल्याउन अनुमति मागेको छ। उनीहरूले तीन महिनाभित्र बेलिब्रिज जडान गर्ने प्रतिबद्धता जनाएका छन्।
रसुवामा बाढीले ११ जनाको ज्यान गएको थियो र सडक अवरुद्ध भएपछि रसुवागढी सुक्खा बन्दरगाह र जलविद्युत् आयोजना प्रभावित भएका थिए।
गृहमन्त्रालयका प्रवक्ता आनन्द काफ्लेका अनुसार, चीनले पठाउन चाहेको कामदारहरूको क्लियरन्सका लागि जिल्ला प्रशासन कार्यालय, रसुवाले पत्र मन्त्रालयमा पठाएको छ र कूटनीतिक प्रक्रियामा काम अघि बढेको छ।
विपद् जोखिम न्यूनीकरण प्राधिकरणले २४ असारमा बाढीपछिको बैठकमा पुल पुनर्निर्माणका लागि चीनसँग सहकार्य गर्ने निर्णय गरेको थियो। चिनियाँ पक्षले पहिले पनि मितेरी पुल निर्माणमा सहयोग पुर्याएको भएकाले फेरि सहयोगका लागि अनुरोध गरिएको हो।
