काठमाडौं, साउन ५ — भोटेकोशी नदीमा आएको विनाशकारी बाढीबाट क्षति पुगेका भौतिक संरचनाहरूको पुनर्निर्माणमा चीनले नेपाललाई सहयोग गर्ने भएको छ।
उपप्रधानमन्त्री तथा अर्थमन्त्री विष्णुप्रसाद पौडेल र चीनको अन्तर्राष्ट्रिय विकास सहायता नियोगका अध्यक्ष चेन सियाओदोङबीच भएको भेटवार्तामा उक्त प्रतिबद्धता जनाइएको हो।
असार २४ गते तिब्बत क्षेत्रबाट आएको लेन्दे र केरुङ खोलाको बाढी भोटेकोशीमा मिसिएर शक्तिशाली बन्दै गएको थियो। त्यसबाट ६ जना चिनियाँ नागरिकसहित १७ जना बेपत्ता भएका थिए। हालसम्म ११ शव तथा केही मानवअंग फेला परिसकेका छन्।
चीनले नेपाल सरकारले उद्धार तथा खोजीमा देखाएको सक्रियता र तत्परताको कदर गर्दै बाढीपछि नेपाललाई आवश्यक सहायता गर्ने घोषणा गरेको हो। अर्थमन्त्री पौडेलले पुनर्निर्माणलाई नेपाल सरकारले उच्च प्राथमिकतामा राखेको जनाउँदै चीनको सहयोगप्रति आभार व्यक्त गरे।
बैठकपछि चार परियोजनामा समझदारी पत्रमा हस्ताक्षर गरिएको छ, जसअनुसार चीनले भरतपुर क्यान्सर अस्पताल, सिभिल अस्पताल र रसुवागढी–केरुङ ट्रान्समिसन लाइनका पुनर्निर्माणमा सहयोग गर्नेछ।
उनले रसुवा नाकालाई आयात-निर्यात र राजस्वका दृष्टिले महत्वपूर्ण बताउँदै पुनर्निर्माण कार्यलाई छिटो अघि बढाइने उल्लेख गरे।
