काठमाडौं, साउन ९ – परराष्ट्रमन्त्री डा. आरजु राणा देउवाले नेपाल र थाइल्यान्डबीच गहिरो सांस्कृतिक समानता रहेको बताउँदै पर्यटन तथा लगानीका क्षेत्रमा सहकार्य विस्तार गर्न सकिने सम्भावनाबारे जोड दिएकी छिन्।
राजधानीमा आयोजित ‘थाई फ्लेभस् इन द हिमाल्ज’ ट्रेड फेयरको उद्घाटन कार्यक्रममा बोल्दै उनले दुई देशबीच ऐतिहासिक सम्बन्ध मार्फत सांस्कृतिक, धार्मिक र बहुसांस्कृतिक मूल्यहरूको साझा सम्मान र सहिष्णुता रहेका कुरा औँल्याइन्।
परराष्ट्रमन्त्रीले नेपाल र थाइल्याण्डमा पाहुनाहरूसँग व्यवहार गर्दै गरिने स्वागत संस्कार, पर्यटन प्रवर्धन र दुई देशका साझा समृद्धिको सम्भावनामा जोड दिइन्।
उनले नेपालमा पर्यटन र हस्पिटालिटी क्षेत्रमा थाई लगानीकर्ताहरूको सक्रिय सहभागिता आवश्यक रहेको र उद्योग र हस्तकलामा पनि थाई व्यवसायीहरूलाई लगानी गर्न आग्रह गरिन्। मन्त्री राणाले दुई देश स्वतन्त्र र स्वाधीन राष्ट्र भएकाले साझा विकासका लागि थप सहकार्य आवश्यक भएको पनि स्मरण गराइन्।
साथै प्रधानमन्त्री केपी शर्मा ओलीको हालैको थाइल्याण्ड भ्रमणमा सरकार र निजी क्षेत्रबीच भएको सहमति तथा समझदारीहरूको चर्चा गर्दै भविष्यका परियोजनाहरूमा यसले थप प्रगति ल्याउने विश्वास व्यक्त गरिन्।
