काठमाडौँ — नेपाली यू–१६ युवा क्रिकेट टोलीले मलेसियामा जारी एसीसी यू–१६ इस्ट जोन कप क्रिकेट प्रतियोगिताको फाइनलमा सिंगापुरसँग प्रतिस्पर्धा गर्ने अवसर पाएको छ। बिहीबार भएको सेमिफाइनल खेलमा नेपालले मलेसियालाई ९ विकेटले पराजित गर्दै फाइनल यात्रा तय गर्यो। अर्कोतर्फ, सिंगापुरले हङकङलाई हराउँदै फाइनलमा स्थान बनाएको छ।
फाइनल खेल आइतबार हुने तय भएको छ। नेपाल प्रतियोगितामा अपराजित रहँदै फाइनलमा पुगेको छ भने सिंगापुर समूहबाट उपविजेता भएर सेमिफाइनलमा पुगेको हो। समूह चरणमा नेपालसँग पराजित सिंगापुरले सेमिफाइनलमा हङकङलाई हराएर फाइनलमा स्थान बनाएको हो।
सेमिफाइनलमा नेपालले मलेसियाले दिएको ९१ रनको लक्ष्य ११.४ ओभरमा १ विकेट गुमाएर पूरा गर्यो। ओपनर परिमार्जन यादवले ३५ बलमा ५ चौका र ५ छक्का सहित अविजित ५९ रन बनाए भने शिवांश बजगाईंले २३ रनको योगदान दिए। मलेसियाका लागि नागिश्वरण सथकुमारनले १ विकेट लिए।
बलिङतर्फ नेपालका अभय यादवले १० ओभरमा १५ रन खर्चेर ४ विकेट लिए भने शुभम खनालले ३ विकेट लिए। कप्तान विपिनप्रसाद शर्मा र सचिन भट्टले पनि एक/एक विकेट हात पारे।
अर्कोतर्फ, सिंगापुरले सेमिफाइनलमा हङकङले प्रस्तुत गरेको १६९ रनको चुनौतीलाई ३८.५ ओभरमा ६ विकेट गुमाउँदै पूरा गर्दै अन्तिम यात्रा तय गर्यो।
