२३ असार, २०८२ – काठमाडौं — गृहमन्त्री तथा परराष्ट्र जिम्मेवारीसमेत सम्हालिरहेका रमेश लेखक र स्वीटजरल्याण्डका विदेशमन्त्री इग्नाजिओ क्यासिसबीच सोमबार काठमाडौंमा द्विपक्षीय भेटवार्ता सम्पन्न भएको छ।
गृह मन्त्रालयका प्रवक्ता रामचन्द्र तिवारीका अनुसार, भेटमा दुई देशबीचको मित्रवत् सम्बन्ध, नेपालमा विकास र शान्ति प्रक्रियामा स्वीटजरल्याण्डले पुर्याएको योगदान, साथै आगामी सहकार्यका सम्भावनाहरूबारे सकारात्मक कुराकानी भएको छ।
भेटमा जलवायु परिवर्तन, विपद् जोखिम व्यवस्थापन, र आर्थिक साझेदारीका विषयमा समेत ध्यान केन्द्रित गरिएको थियो। गृहमन्त्री लेखकले नेपालको विकास यात्रामा स्विस सरकारको सहयोगको कदर गर्दै भविष्यमा अझ प्रभावकारी साझेदारीको अपेक्षा व्यक्त गरे।
दुवै पक्षले आपसी चासोका विषयमा निरन्तर संवाद र सहकार्य आवश्यक रहेको भन्दै सम्बन्धलाई अझ प्रगाढ बनाउने प्रतिबद्धता जनाएका थिए। भेटवार्ताले नेपाल–स्वीटजरल्याण्ड सम्बन्धमा सकारात्मक ऊर्जा थप्ने विश्वास गरिएको छ।
