काठमाडौं, जेठ २६ — नेपाल स्टक एक्सचेञ्ज (नेप्से) परिसूचक सोमबार २३.१९ अंकले उकालो लाग्दै २,६५३.०९ बिन्दुमा पुगेको छ। अघिल्ला चार दिन लगातार गिरावट आएको बजारले आज सुधार देखाएको हो। नेप्से सूचक ०.८८ प्रतिशतले बढेको हो।
दिनभर भएको कारोबारमा १९१ कम्पनीको सेयर मूल्यमा वृद्धि देखिएको छ भने ५६ कम्पनीको मूल्य घट्यो। १ कम्पनीको मूल्य स्थिर रह्यो। कुल ७८ हजार ८४८ पटकको कारोबारमा १ करोड ७५ लाख कित्ता बढी सेयर किनबेच भएका छन्।
तर, बजार उकालो लागे पनि कारोबार रकम भने अघिल्लो दिनको तुलनामा केही घटेको देखिन्छ। सोमबार कुल ८ अर्ब ६८ करोड रुपैयाँ बराबरको सेयर कारोबार भयो, जुन आइतबारको ९ अर्ब १३ करोड रुपैयाँको तुलनामा केही कम हो।
१३ वटा उपसमूहमध्ये होटेल तथा पर्यटन, जीवन बीमा र व्यापार समूहको परिसूचकमा गिरावट आएको छ। बाँकी समूहमा सुधार देखिएपछि नेप्सेमा समग्र सुधार आएको हो।
बजार विश्लेषकहरूका अनुसार, पछिल्ला दिनहरूमा आएको निरन्तर गिरावटपछि लगानीकर्ताहरू अलि आशावादी देखिएका छन्। यद्यपि कारोबार रकममा आएको गिरावटले भने बजारको दिगोपनप्रति केही शंका राख्न सकिने संकेत दिएको उनीहरूको भनाइ छ।
