काठमाडौं, १५ भदौ – साताको पहिलो दिन आइतबार शेयर बजार नकारात्मक अवस्थामा बन्द भएको छ। नेप्से परिसूचक ३१.१७ अंकले ओरालो लाग्दै १.१२ प्रतिशतले घटेको हो। बजार खुल्नेबित्तिकै रातो अंकमा पुगेको नेप्से अन्तिमसम्म पनि सुधार हुन सकेन।
यस दिन कारोबार रकम पनि उल्लेख्य मात्रामा घटेको छ। गत बिहीबार ८ अर्ब ९ करोडको कारोबार भएपनि आइतबार जम्मा ६ अर्ब ६ करोडमा सीमित रह्यो।
सूचकगत हिसाबले सबै समूहमा गिरावट देखियो। सबैभन्दा धेरै विकास बैंक समूह १.५९ प्रतिशतले घट्यो भने बैंकिङ, फाइनान्स, हाइड्रोपावर, जीवन बीमा, माइक्रोफाइनान्सलगायत सबै क्षेत्रमा नकारात्मक प्रभाव देखियो।
२१ कम्पनीको मूल्यमा सुधार भए पनि २२८ कम्पनी रातो अंकमा बन्द भए। उन्नति सहकार्य लघुवित्त ६.७७ प्रतिशतले बढ्दै अग्रस्थानमा रह्यो भने आशा लघुवित्त, समता लघुवित्त र मिड सोलु पनि लाभमा रहे।
तर, नेपाल रिपब्लिक मिडिया ७.४५ प्रतिशतले घट्दै सबैभन्दा बढी मूल्य गुमाउने कम्पनी बन्यो। छ्याङ्दी हाइड्रोपावर, पिपुल्स पावर र अन्य केही कम्पनीमा पनि उल्लेख्य गिरावट देखियो।
आजको दिन धेरै कारोबार भएका कम्पनीमा नेपाल पुनर्बीमा, हिमालयन रिइन्स्योरेन्स, हिमालयन डिस्टिलरी, नेपाल रिपब्लिक मिडिया र पिपुल्स पावर रहेका छन्।
