काठमाडौं, भदौ २ — पूर्वराष्ट्रपति विद्यादेवी भण्डारीले आफू अझै पनि नेकपा (एमाले)प्रति निष्ठावान कार्यकर्ता भएको दोहोर्याएकी छन्। विराटनगर विमानस्थलमा पत्रकारहरूसँग कुरा गर्दै उनले आफ्नो राजनीतिक यात्रा नै एमालेसँग सुरु भएको र आजसम्म पनि त्यसकै सिद्धान्तअनुसार अघि बढिरहेको बताइन्।
उनले स्मरण गरिन्, म ४५ वर्षअघि नै एमालेको सदस्य बनेकी हुँ। त्यतिबेलै यहाँ विराटनगरमै शपथ खाएकी थिएँ। राष्ट्रपतिमा निर्वाचित हुँदा पनि पार्टीकै निर्णय र समर्थनकै आधारमा पुगेकी हुँ।
भण्डारीले राजतन्त्र र गणतन्त्रबीचको भिन्नता स्पष्ट गर्दै राष्ट्रपतित्वलाई आवधिक पद भएको बताइन्। उनका अनुसार कार्यकाल सकिएपछि जुनसुकै नागरिकले फेरि आफ्नो सामान्य वा राजनीतिक जीवनमा फर्किन सक्नेछ।
पार्टीभित्र आफूले कुन भूमिका पाउने भन्ने प्रश्नमा उनले सबै निर्णयबारे जानकारी हुने अवस्था नरहेको जनाइन्। “पार्टीका सबै सदस्यले सबै कुरा थाहा पाउँदैनन्, निर्णय गर्ने कमिटीमा रहेका साथीहरूले मात्र थाहा पाउँछन्,” भण्डारीको भनाइ थियो।
उनले आफूमाथि आउने आलोचना र आरोपलाई सामान्य रूपमा लिइन्। “राजनीतिमा जोसुकै पनि आलोचनाभन्दा मुक्त हुँदैन, म पनि छैन,” उनले भनिन्।
गुट चलाएको भन्ने आरोपबारे भण्डारीले कडाइका साथ खण्डन गरिन्। “मलाई गुट चलाउन आउँदैन। पार्टीभित्र एकता र संस्थागत हित नै मेरो प्राथमिकता हो,” उनले स्पष्ट पारिन्।
त्यसैगरी, हालै कांग्रेस नेता डा. शेखर कोइरालासँग भएको भेटलाई उनले स्वाभाविक घटना भएको बताइन्। “हामी दुवै विराटनगरकै हौं, सामान्य भेटघाटलाई अनावश्यक रूपमा ठूलो विषय बनाउनुपर्छ जस्तो लाग्दैन,” भण्डारीले भनिन्।
