काठमाडौं, साउन ५ — पोखरामा कोरोना संक्रमणबाट एक ७४ वर्षीया महिलाको ज्यान गएको छ। गण्डकी प्रदेश स्वास्थ्य निर्देशनालयका निर्देशक खीमबहादुर खड्काले उक्त घटनाको पुष्टि गरेका छन्।
उक्त महिला केही दिनदेखि पोखरास्थित चरक अस्पतालमा उपचाररत थिइन्। उनलाई कोरोना संक्रमणसँगै उच्च रक्तचाप र मधुमेहजस्ता दीर्घरोग पनि थिए। अस्पताल प्रशासनका अनुसार कोरोना संक्रमणसँगै अन्य स्वास्थ्य समस्या पनि देखिएको भए तापनि, कोरोना पुष्टि भइसकेकोले मृत्युमा संक्रमणले समेत भूमिका खेलेको मानिएको छ।
गण्डकी प्रदेशमा पछिल्ला दिनमा कोरोना संक्रमण दर विस्तारै बढ्दै गएको छ। हाल प्रदेशभर ८ जना संक्रमित उपचारमा रहेका छन्। तीमध्ये कास्कीमा ५ जना, बागलुङमा २ जना र स्याङ्जामा १ जना संक्रमित छन्।
स्वास्थ्य निकायले संक्रमण दर बढ्दै गएकाले सतर्कता अपनाउन आग्रह गरिरहेको छ। विशेषगरी दीर्घरोगी र बृद्धबृद्धाले थप सावधानी अपनाउन जरुरी देखिएको छ।
