काठमाडौं, भदौ १ — कमेडियन विकास अर्यालले टिभी शो ‘कमेडी दरबार’मा पूर्वप्रधानमन्त्री पुष्पकमल दाहाल (प्रचण्ड) को क्यारिकेचर गरेपछि अज्ञात व्यक्तिबाट धम्की आएको बताएका छन्। उनले धम्कीपूर्ण फोनमा भिडियोका केही संवाद हटाउन भनिएको जानकारी दिँदै, आफूले यो प्रस्तुति कमेडी कार्यक्रमकै रूपमा तयार गरेको र विवाद सिर्जना गर्ने उद्देश्य नभएको बताए।
अर्यालले सामाजिक सञ्जालमा लेख्दै, “कृपया हास्यव्यंग्यलाई हास्यव्यंग्यकै रूपमा लिनुहोस्। हाम्रो उद्देश्य केही क्षणका लागि हाँसाउनु हो, विवाद ल्याउनु होइन,” भनी स्पष्ट पारेका छन्। उनले बताए अनुसार, ‘माग्ने राजा’ फिल्म विशेष एपिसोडमा प्रचण्डको नक्कल गर्ने क्रममा केही संवादहरूलाई लिएर पटक–पटक धम्कीपूर्ण फोन आएका थिए।
उक्त संवादहरूमा, ४३ मिनेटको भिडियोमा बोलेको “मलाई सामान्य नठान्नुस् के, म युद्ध मात्र लडेको होइन, चुनाव मात्र लडेको होइन, अस्ति ट्वाइलेटमा पनि लडेको मान्छे हो” र ४४ मिनेटको भिडियोमा अभिनेत्री बर्षा सिवाकोटीलाई माओवादीसँग तुलना गर्दै गरिएको व्यंग्यलाई लिएर आपत्ति जनाइएको बताइएको छ।
अर्यालले भनेका छन् कि उनी यो कार्यक्रम हाँस्य–व्यंग्यको रुपमा प्रस्तुत गरिरहेका छन् र कुनै पनि प्रकारको धम्की वा विरोधलाई व्यक्तिगत रुपमा नलिन आग्रह गर्छन्। उनले आफ्नो उद्देश्य शुद्ध मनोरञ्जन मात्र रहेको स्पष्ट पारेका छन्।
