काठमाडौं, असार ३ — प्रतिनिधिसभाको आजको बैठकमा राष्ट्रिय स्वतन्त्र पार्टी (रास्वपा) का सांसदहरूले फेरि नाराबाजी गरेका छन्। बैठक सुरु हुनासाथ रास्वपाकी सांसद चन्दा कार्कीले भिजिट भिसा प्रकरणमा सरकारको मौनता प्रति आक्रोश व्यक्त गर्दै उच्चस्तरीय छानबिन समितिको माग गरिन्।उनले भिजिट भिसाको समस्या २०६४ सालदेखि चल्दै आएको गम्भीर विकृति भएको बताउँदै तत्कालीन र वर्तमान सरकारहरूलाई जिम्मेवार ठहर गरिन्।
सभामुख देवराज घिमिरेले नेपाली कांग्रेसका प्रमुख सचेतक श्याम घिमिरेलाई बोलाएर छलफल अघि बढाए पनि रास्वपा र राष्ट्रिय प्रजातन्त्र पार्टी (राप्रपा) का सांसदहरूले विरोध जारी राखे। यसैबीच सभामुखले बैठकलाई आधा घण्टा पछि स्थगित गर्ने निर्णय गरे। विपक्षी दलहरूले गृहमन्त्री रमेश लेखकको राजीनामा र छानबिन समिति गठन नभएसम्म संसदमा अवरोध जारी राख्ने चेतावनी दिएका छन्। यसरी संसदमा भिजिट भिसा प्रकरणलाई लिएर जारी विरोधका कारण बैठक नियमित रूपमा सञ्चालन हुन सकेको छैन।
