२४ जेठ, काठमाडौं — प्रधानमन्त्री केपी शर्मा ओलीले मोरङको कटहरी गाउँपालिका–२, हल्दीबारीमा निर्माण गरिएको जीवन विकास सामुदायिक अस्पताल तथा टेक्निकल एजुकेशन फाउन्डेशनको उद्घाटन गरेका छन्।
करिब २ अर्ब रुपैयाँको लागतमा निर्माण गरिएको २०० शैय्याको यो अस्पताल समाजसेवी संस्था जीवन विकास समाजको अगुवाइमा स्थापना गरिएको हो। अस्पताललाई सामाजिक व्यवसायको मोडेलमा सञ्चालन गरिने जनाइएको छ—जहाँ मुनाफा वितरण नगरी सेवा केन्द्रित नीति अपनाइएको छ।
अस्पतालका अध्यक्ष तथा मोरङ क्षेत्र नम्बर ५ का सांसद योगेन्द्र मण्डलका अनुसार, स्वास्थ्य सेवा र प्राविधिक शिक्षालाई ग्रामीण क्षेत्रमा प्रवर्धन गर्ने लक्ष्यसहित यो आयोजना अगाडि बढाइएको हो।
उद्घाटन कार्यक्रममा मोरङ र सुनसरीका विभिन्न क्षेत्रबाट करिब १० हजार मानिस सहभागी भएका थिए। प्रधानमन्त्री ओलीले जनस्वास्थ्य र प्राविधिक शिक्षामा लगानीलाई देश विकासको आधारका रूपमा व्याख्या गरे।
