२८ असार,काठमाडौं — प्रधानमन्त्री केपी शर्मा ओलीले सत्तारूढ गठबन्धन आगामी निर्वाचनसम्म यथावत् रहने दाबी गरेका छन्। झापाको कनकाइ नगरपालिकामा आयोजित भूमि समस्या समाधान आयोगको कार्यक्रममा बोल्दै उनले सरकारको स्थायित्वप्रति आशावादी दृष्टिकोण व्यक्त गरे।
प्रधानमन्त्री ओलीले गठबन्धनभित्र स्पष्ट समझदारी रहेको उल्लेख गर्दै, “अहिलेसम्म एक वर्ष मैले सरकार चलाएँ, अर्को एक वर्ष म प्रधानमन्त्री रहनेछु। त्यसपछि सत्ता नेतृत्व नेपाली कांग्रेसका सभापति शेरबहादुर देउवालाई सुम्पिनेछौं,” भने। उनले सरकार ढल्ने अफवाह फैलाउनेहरूलाई नजरअन्दाज गर्न आग्रह गरे।
उक्त कार्यक्रममा भूमिहीन, दलित, सुकुम्बासी र अव्यवस्थित बसोबासीहरूलाई जग्गा धनीपुर्जा वितरण गरिएको थियो। ओलीले यस कार्यलाई ऐतिहासिक उपलब्धि भन्दै भूमिहीनहरूलाई वैधानिक अधिकार दिलाउन सरकार प्रतिबद्ध रहेको बताए।
त्यस अवसरमा प्रधानमन्त्रीले जमिनको सदुपयोग गर्दै व्यावसायिक खेतीमा लाग्न पनि आह्वान गरे। साथै, उनले शिक्षा, स्वास्थ्यलगायत क्षेत्रमा देखिएको सुधारको उल्लेख गर्दै देश समृद्धिको दिशामा अघि बढिरहेको बताए।
